Չինական SinoVac դեղագործական ընկերությունը հայտարարել է, որ կորոնավիրուսի դեմ պատվաստանյութը, որն այն մշակում է, պետք է պատրաստ լինի 2021 թվականի սկզբին ամբողջ աշխարհով, այդ թվում` ԱՄՆ-ում տարածելու համար, փոխանցում է AP-ն:

Գործադիր տնօրեն Ին Վեյդունը խոստացել է ԱՄՆ Սննդամթերքի եւ դեղամիջոցների որակի սանիտարական վերահսկման վարչությանը դիմում ներկայացնել ԱՄՆ-ում CoronaVac-ի վաճառքի համար, եթե պատվաստանյութն անցնի մարդկանց վրա փորձարկումների երրորդ եւ վերջին փուլը: Նրա խոսքով` իրեն անձամբ փորձարարական պատվաստանյութ է ներարկվել:

«Մեր նպատակն է պատվաստանյութը տրամադրել ամբողջ աշխարհին, այդ թվում` ԱՄՆ-ին, ԵՄ-ին եւ այլ երկրներին»,- ասել է նա:

ԱՄՆ-ում, Եվրամիությունում, Ճապոնիայում եւ Ավստրալիայում կոշտ կանոնակարգերը պատմականորեն արգելափակել են չինական պատվաստանյութերի վաճառքը: Սակայն Ին Վեյդունը կարծում է, որ այդ պրակտիկան կարող է փոխվել:

SinoVac-ը մշակում է Չինաստանի պատվաստանյութի չորս խոշոր թեկնածուներից մեկը` պետական ​​SinoPharm-ի հետ միասին:

Ավելի քան 24.000 մարդ է մասնակցում CoronaVac-ի կլինիկական փորձարկումներին Բրազիլիայում, Թուրքիայում եւ Ինդոնեզիայում, լրացուցիչ փորձարկումներ են նախատեսված Բանգլադեշում եւ, հնարավոր է, Չիլիում, հայտնել է Ին Վեյդունը: Նա նշել է, որ SinoVac-ն ընտրել է այս երկրները, քանի որ այնտեղ կային լուրջ բռնկումներ, մեծ քանակությամբ բնակչություն եւ հետազոտության եւ զարգացման սահմանափակ հնարավորություններ:

Ընկերությունը կանխատեսում է, որ մինչեւ հաջորդ տարվա փետրվար կամ մարտ կկարողանա պատվաստանյութի մի քանի հարյուր միլիոն չափաբաժին արտադրել:

SinoVac-ը սկսում է նաեւ CoronaVac-ի փոքր չափաբաժիններ փորձարկել Չինաստանում երեխաների եւ տարեցների վրա` նշելով աշխարհում դեպքերի աճն այս երկու խմբերի շրջանում: Ընկերությունը առաջնահերթ ուշադրություն կդարձնի պատվաստանյութերի տարածմանն այն երկրներում, որտեղ CoronaVac-ը փորձարկվում է մարդկանց վրա:

Վեյդունն ասել է, որ ինքն առաջիններից մեկն է ստացել փորձնական պատվաստանյութը մի քանի ամիս առաջ, այն բանից հետո, երբ մարդկանց վրա փորձարկումների առաջին եւ երկրորդ փուլերը լուրջ կողմնակի բարդություններ ցույց չտվեցին:

Այս տարվա սկզբին Չինաստանը թույլատրել էր թեկնածուների պատվաստանյութերի «շտապ կիրառումը» ռիսկային խմբերի համար, ինչպիսիք են սահմանապահները եւ բուժաշխատողները: Հունիսին SinoVac-ը SinoPharm-ի եւ CanSino-ի հետ միասին հաստատում էր ստացել եւ կարողացել էր CoronaVac-ի տասնյակ հազարավոր դեղաչափեր տրամադրել Պեկինի քաղաքային կառավարությանը:

SinoVac-ի աշխատակիցներն իրավունք ունեն պատվաստանյութն օգտագործել արտակարգ իրավիճակներում, քանի որ ընկերության ներսում բռնկումը կարող է խաթարել պատվաստանյութ մշակելու դրա կարողությունը: Այն ստացել է ընկերության աշխատակիցների շուրջ 90 տոկոսը: «Մենք վստահ ենք, որ COVI-19-ի դեմ պատվաստանյութերի վերաբերյալ մեր հետազոտությունները կարող են համապատասխանել ԱՄՆ եւ ԵՄ չափանիշներին»,- ասել է Վեյդունը: