Բելառուսի ընդդիմության համակարգող խորհրդի անդամ Մարիա Կոլեսնիկովային անհայտ անձինք սեպտեմբերի 7-ի առավոտյան Ազգային գեղարվեստական թանգարանի մոտից նստեցրել են «Կապ» գրությամբ միկրոավտոբուսն և տարել անհայտ ուղղությամբ: Ինչպես նշում է rbc.ru-ն, այս մասին պատմել է ականատեսը:

Վերջինիս խոսքով՝ ամեն ինչ տեղի է ունեցել 10:05-ի սահմաններում (Երևանի ժամանակով 11:05)՝ Ազգային թանգարանի մոտակայքում: Ականատեսն Անկախության պողոտայից գնում էր թանգարանի ուղղությամբ, երբ լսել է բարձրակրունկ կոշիկների ձայն, շրջվել և տեսել է Կոլեսնիկովային:

«Ես մինչ այդ էլ  էի նրան տեսել, այդ իսկ պատճառով ճանաչեցի: Մի պահ ցանկանում էի մոտենալ, խոսել, շնորհակալություն հայտնել, հետո մտափոխվեցի` մտածելով, որ մարդն առանց այն էլ հոգնում է: Ես մի փոքր առաջ գնացի, հետո մտածեցի՝ շրջվեմ ու Մաշային սրտիկ ցույց տամ: Թանգարանից ոչ հեռու մուգ միկրոավտոբուս տեսա, որի վրա գրված էր «Կապ» դրա հետևում ևս մեկ մեքենա կար: Ես առաջ անցա և ասֆալտին ընկնող հեռախոսի ձայն լսեցի, հետո ոտնաձայներ, շրջվեցի ու տեսա, որ քաղաքացիական հագուստով և դիմակներով մարդիկ Մարիային հրում են դեպի միկրոավտոբուս, նրա հեռախոսն ընկնում է, այդ մարդկանցից մեկը հեռախոսը վերցնում է, մտնում է միկրոավտոբուս և նրանք հեռանում են»,-պատմել է ականատեսը:

Վերջինս չի կարողացել տեղի ունեցածը նկարել հեռախոսով, քանի որ շատ մոտ է եղել դեպքի վայրին և վախեցել է, որ իրեն էլ կտանեն:

Այժմ Կոլեսնիկովայի հեռախոսը հասանելի է, բայց նա չի պատասխանում զանգերին:

Համակարգող խորհրդի մամուլի քարտուղար Անտոն Ռոդնենկովը 10:13-ին տեղեկացրել է կայքին, որ Մարիան քաղաքի կենտրոնում միայնակ է եղել: Մարիայի անհետացման մասին Ռոդնենկովն իմացել է կայքից և փորձել է պարզել նրա գտնվելու վայրը: Ժամը 11-ից Ռոդնենկովի հեռախոսային համարը անհասանելի է դարձել:

«Թե որտեղ են Մարիան ու Անտոնը, չգիտեմ, չեմ կարողանում կապվել նրանց հետ:Կապ չկա նաև համակարգող խորհրդի անդամ  Մաքսիմ Բոգրեցովի և խորհրդի գործադիր քարտուղար Իվան Կրավցովի հետ»,-տեղեկացրել է խորհրդի անդամ Մաքսիմ Զնակը:

Բոգրեցովն ավելի ուշ կապի է դուրս եկել, նրա հետ ամեն ինչ լավ է:

Նշենք, որ բողոքի ցույցերը Բելառուսում չեն դադարում օգոստոսի 9-ին կայացած նախագահական ընտրություններից ի վեր. ընդդիմադիրներն ու նրանց կողմնակիցներն ամեն օր փողոց են դուրս գալիս՝ բողոքելով ընտրությունների արդյունքներից, որոնց համաձայն՝ հաղթող է ճանաչվել երկրի գործող նախագահ Ալեքսանդր Լուկաշենկոն: