Քրեական ոստիկանության գլխավոր վարչության թմրամիջոցների անօրինական շրջանառության դեմ պայքարի վարչությունում ստացվել էին օպերատիվ տվյալներ, որոնք իրացվեցին սեպտեմբերի 2-ին:

Հարուցված քրեական գործի շրջանակում մայրաքաղաքի Ղափանցյան փողոցի տներից մեկում կատարված խուզարկությանը մասնակցեցին նաեւ Արաբկիրի քննչական բաժնի ծառայողները, Արաբկիրի քրեական հետախույզներն ու ոստիկանության պետական պահպանության գլխավոր վարչության շնավարժները:

40 եւ 37 տարեկան եղբայրներին պատկանող տնից ու բակից հայտնաբերվեցին մեծ քանակությամբ թմրամիջոցներ ու զենք-զինամթերք: Մասնավորապես` առգրավվել են 0,4 գրամ կոկաինի, 1,5 գրամ հերոինի, 8,4 գրամ ափիոնի, 5,8 գրամ մեթամֆետամինի եւ 554,8 գրամ մարիխուանայի նմանվող զանգվածներ, մոտ 1200 գրամ մեթադոնի դեղահաբեր, 5 միլիլիտր քացախաթթվի անհիդրիդի նմանվող զանգված, լորազեպամի՝ 29, տրամադոլի՝ 38, եւ պրեգաբալինի 15 հոգեմետ դեղահաբ:

Հարուստ էր նաեւ առգրավված զենք-զինամթերքի տեսականին: «Դեռինջեր» տիպի՝ երկու, «Պարմա» եւ նագան տիպի մեկական ատրճանակ, ինքնաձիգ, «ՌԳԴ» տիպի նռնակ, տարատեսակ 333 փամփուշտներ:

Նշանակվել են դատաքիմիական եւ դատաձգաբանական փորձաքննություններ: Եղբայրներից մեկը ձերբակալվել է, ձեռնարկվում են միջոցառումներ՝ մյուսին հայտնաբերելու ուղղությամբ: Կատարվում է նախաքննություն: