ՀՀ քննչական կոմիտեի Կոտայքի մարզային քննչական վարչության Նաիրիի քննչական բաժնում քննվող քրեական գործով իրականացված քննչական եւ դատավարական այլ գործողությունների արդյունքում բացահայտվել է Քանաքեռավան համայնքում կատարված բնակարանային գողության դեպքը: Մեղադրանք է առաջադրվել Երեւան քաղաքի 31-ամյա բնակչին: Այս մասին հայտնում են ՀՀ քննչական կոմիտեի տեղեկատվության եւ հասարակայնության  հետ կապերի բաժնից։

Քննությամբ ձեռք բերված տվյալների համաձայն՝ 2020թ. հունիսի 16-ին, ժամը 02:00-ի սահմաններում, 31-ամյա տղամարդը ուրիշի գույքի գաղտնի հափշտակություն կատարելու դիտավորությամբ, ձեռքով քանդել-բացել է մետաղալարով փակված Կոտայքի մարզի Քանաքեռավան համայնքի 6-րդ փողոցում տեղակայված բնակության վայր հանդիսացող վագոն-տնակի մուտքի դուռը, ապօրինի մուտք գործել ներս, հափշտակել տարբեր տեսակի կենցաղային իրեր եւ  էլեկտրական սարքավորումներ՝ քաղաքացուն պատճառելով զգալի չափերով գույքային վնաս:

Ձեռք բերված բավարար ապացույցների համակցությամբ՝ 31-ամյա տղամարդուն մեղադրանք է առաջադրվել՝ ՀՀ քրեական օրենսգրքի 177-րդ հոդվածի (գողություն) 3-րդ մասի 1.1 կետով:

Նախաքննությունը շարունակվում է: