«Բարգավաճ Հայաստան» խմբակցության պատգամավոր Նաիրա Զոհրաբյանն իր ֆեյսբուքյան էջում գրել է․

«Ֆրիդրիխ Բարբարոսան, Գրյունվալդի ճակատամարտն ու Դոնալդ Տուսկը

Փաստորեն, երբ ԵԺԿ Արևելյան գործընկերության առաջնորդների գագաթաժողովն ընդունեց հայտարարություն, որում իր մտահոգությունն էր հայտնում Հայաստանում ժողովրդավարության հետընթացի հետ կապված և կոչ էր անում իշխանություններին զերծ մնալ ընդդիմության նկատմամբ ճնշումներից, դրանից հետո սկսվեց աննախադեպ մի բոլոլա:

Իշխանության տարբեր ներկայացուցիչներ մի այլ ձևի ԵԺԿ նախագահ Դոնալդ Տուսկի «պորտը տեղը դրեցին» ու կոչ արեցին ԵԺԿ-ին հանգիստ նստել տեղը: Առ այս պահը ԵԺԿ-ին պատին ծեփելու և պինցետով ախտահանելու կոչեր դեռ չեն հնչել, բայց, ամեն ինչ առջևում է:

Ընդամենը թեթևի մեջ հիշեցնեմ, որ Եվրոպական Ժողովրդական կուսակցությունը Եվրոպայի ամենամեծ վերազգային կուսակցությունն է, որի անդամ են ԵՄ բազմաթիվ երկրների իշխող կուսակցություններ, իսկ ԵԺԿ նշյալ սամիթին մասնակցում էին, օրինակ, Գերմանիայի կանցլեր Անգելա Մերկելը, Եվրոպական հանձնաժողովի նախագահ Ուրսուլա ֆոն Դեր Լեյենը, ինչպես նաև եվրոպական մի շարք երկրների նախագահներ և վարչապետեր:
Բայց, դա կապ չունի, նրանց բոլորի պորտը իշխանության տարբեր սուբյեկտներ տեղում դրեցին տեղը:
Ի վերջո, ո՞վ են նրանք:

Էդ ինչո՞ւ Անգելա Մերկելը չէր խոսում էն ժամանակ, երբ Ֆրիդրիխ Բարբարոսան իր զորքերով կռվում էր Սուրբ Երուսաղեմը մուսուլմաններից ազատագրելու համար:

Էդ ինչո՞ւ Դոնալդ Տուսկը չէր խոսում էն ժամանակ, երբ 15-րդ դարում Գրյունվալդի ճակատամարտում լեհական զորքերը պայքարում էին գերմանական օրդաների դեմ:

Էդ ինչո՞ւ Ուրսուլա ֆոն Դեր Լեյենը չէր խոսում էն ժամանակ, երբ Ալեքսանդր Նևսկու զորքերն իրենց նախահայրերին ընկղմում էին «Սառցե ճակատամարտ»-ի սառույցների տակ:
Էդ ինչո՞ւ ԵԽԽՎ Եվրոպական պահպանողականների խմբի ղեկավար Յան Լիդլ-Գրեյնջերը չէր խոսում էն ժամանակ, երբ անգլիական քաղաքական կլումբայում սպիտակ և կարմիր վարդերը իրար դեմ էին կռվում, երբ յորքերն ու լանկաստերները դաժանաբար կիսում էին պլանտագենետների ժառանգությունը, ինչի արդյունքում հաղթեցին թյուդորները:

Էդ ո՞ւր էիք դուք բոլորդ էդ ժամանակ:
Նենց որ` դուխով
»։