Ոստիկանությունը շարունակում է բնակչության մոտ ապօրինի պահվող զենք-զինամթերքի հայտնաբերման ուղղությամբ ակտիվ աշխատանքը՝ այդ համատեքստում իրականացնելով նաեւ բացատրական աշխատանք։

Բացատրական աշխատանքի արդյունքում հունիսի 10-ին Արմավիրի մարզի բնակիչներից մեկը զանգել է ոստիկանության Վաղարշապատի բաժին ու հայտնել, որ տարիներ առաջ ձեռք բերած գործարանային համարով ինքնաձիգ ու 41 հատ փամփուշտ է թողել Ոսկեհատ գյուղի ճանապարհին գտնվող մի շինության մոտ։ «Կալաշնիկովն» ու փամփուշտները հայտնաբերվել են։

Նույն օրը Արմավիրի մարզի մեկ այլ բնակիչ Էջմիածին քաղաքի շինություններից մեկի մոտ թողել է կարճեցված խզակոթով, առանց գործարանային համարի «Կալաշնիկով» ինքնաձիգ ու զանգել ոստիկանություն՝ հայտնելով, որ հրազենը ցանկացել է հանձնել ոստիկաններին։

Արմավիր քաղաքի բնակիչներից մեկն էլ ոստիկանության Արմավիրի բաժնում կամավոր հանձնել է թմբուկավոր ատրճանակ, «Ֆ 1» տիպի նռնակ ու տարբեր տրամաչափի 40-ից ավելի փամփուշտ, որոնք գտել է նկուղը մաքրելիս։

Արմավիրի մարզի Դալարիկ գյուղի բնակիչ, 69-ամյա մի տղամարդ ոստիկանության Բաղրամյանի բաժնում կամավոր հանձնել է «ՏՕԶ» տիպի հրազեն՝ երկու փամփշտատուփով, նռնակներ, տարբեր տրամաչափի 250-ից ավելի փամփուշտ եւ այլ ռազմամթերք, որոնք, ըստ նրա՝ պատկանել են հանգուցյալ ընկերոջը։

Ինքնաշեն հրացան, նռնակ ու տարբեր տրամաչափի 50-ից ավելի փամփուշտ ոստիկանության Մեծամորի բաժնում կամավոր հանձնել է Ակնալիճ գյուղի 36-ամյա մի բնակիչ։ Նրա հայտնածով՝ հանգուցյալ հորը պատկանած զենք-զինամթերքը գտել է գոմի տանիքը նորոգելիս։

Շիրակի մարզի Ջրափի գյուղում բնակվող մի տղամարդ հունիսի 10-ին ոստիկանության Անիի բաժին է բերել առանց գործարանային համարի ինքնաձիգ եւ 7,62 մմ տրամաչափի 16 փամփուշտ։ Տղամարդու հայտնածով՝ հրազանեը գտել է գոմում։ Այն պատկանել է հանգուցյալ հորը։

Ոստիկանության Արթիկի բաժնի ծառայողների բացատրական աշխատանքի շնորհիվ Փանիկ գյուղի բնակիչներից մեկը կամավոր հանձնել է «Կալաշնիկովի» տանկային գնդացիր եւ տարբեր տրամաչափի 50-ից ավելի փամփուշտ, որոնք գտել է գոմը մաքրելիս։ Ըստ նրա՝ դրանք պատկանել են հանգուցյալ հորը։

Գործարանային համարով «Կալաշնիկով» ինքնաձիգը ոստիկանության Կումայրիի բաժնում կամավոր հանձնել է Գյումրիում բնակվող մի կին, որի հայտնածով՝ հրազենը պատկանել է հանգուցյալ եղբորը։

Հունիսի 10-ին Հրազդանի Ջրառատ թաղամասի բնակիչ, 34-ամյա մի տղամարդ ոստիկանության Հրազդանի բաժնում կամավոր հանձնել է հանգուցյալ հորը պատկանած ինքնաշեն հրազենը, պայթուցիչով «Ֆ 1» տիպի նռնակն ու ինքնաձիգի 50-ից ավելի փամփուշտ, որոնք գտել է տան տանիքում։

Փոքր Վեդի գյուղի 62-ամյա մի բնակիչ ոստիկանության Արարատի բաժնում կամավոր հանձնել է առանց գործարանային համարի «Կարաբին» տիպի ակոսափող հրազեն, հրանոթի արկ, տարբեր տեսակի նռնակներ, տարբեր տրամաչափի 150-ից ավելի փամփուշտ եւ այլ ռազմամթերք, որոնք, ըստ նրա՝ պատկանել են հանգուցյալ եղբորը։

Ոստիկանության Բազումի բաժնի ծառայողների բացատրական աշխատանքի արդյունքում հունիսի 10-ին բաժնում արձանագրվել է ապօրինի զենք-զինամթերքի կամավոր հանձնման 2 դեպք։ Վանաձորի բնակիչ, 63-ամյա մի տղամարդ կամավոր հանձնել է կարճեցված խզակոթով գործարանային համարով հրացան, նռնակ, դետոնացիոն սարքեր եւ այլն, որոնք, ըստ նրա՝ պատկանել են հանգուցյալ ընկերոջը։ Վանաձորում բնակվող մեկ այլ տղամարդ էլ կամավոր հանձնել է գործարանային համարով թմբուկավոր ատրճանակ, սվին-դանակ ու տարբեր տրամաչափի փամփուշտներ՝ հայտնելով, որ դրանք գտել է գոմում։

Վանաձորի բնակիչ, 66-ամյա մի տղամարդ էլ ոստիկանության Տարոնի բաժնում կամավոր հանձնել է գործարանային համարն անընթեռնելի ատրճանակ եւ 5,45 մմ տրամաչափի 20 փամփուշտ, որը պատկանել է հանգուցյալ եղբորը։

Թմբուկավոր ատրճանակ ու 5,45 մմ տրամաչափի 29 փամփուշտ ոստիկանության Սպիտակի բաժնում կամավոր հանձնել է Շենավան գյուղում բնակվող, 64-ամյա մի տղամարդ, որի հայտնածով՝ դրանք պատկանել են հանգուցյալ եղբորը։

Ապօրինի զենք-զինամթերքի կամավոր հանձնման դեպքեր են արձանագրվել նաեւ ոստիկանության Գեղարքունիքի մարզային վարչության ենթակա ստորաբաժանումներում։ Կարմիր գյուղի բնակիչներից մեկը ոստիկանության Գավառի բաժնում կամավոր հանձնել է տարբեր տեսակի նռնակներ՝ իրենց պայթուցիչներով, գործարանային արտադրության թմբուկավոր ատրճանակ եւ փամփուշտներ։ Հացառատ գյուղի բնակիչներից մեկն էլ, դարձյալ Գավառի բաժնում, կամավոր հանձնել է թմբուկավոր ինքնաշեն ատրճանակ, տարբեր տեսակի նռնակներ ու տարբեր տրամաչափի փամփուշտներ։

Գործարանային համարով «ՏՕԶ» տիպի հրազեն ու փամփուշտներ ոստիկանության Մարտունու բաժնում կամավոր հանձնել է Ծովասար գյուղի 55-ամյա մի բնակիչ, որի հայտնածով՝ դրանք գտել է տան տանիքում։ Նռնականետերը, ինքնաշեն նռնակն ու տարբեր տրամաչափի եւ հրազենների փամփուշտները դարձյալ Մարտունու բաժնում կամավոր հանձնել է Մարտունիում բնակվող 62-ամյա մի տղամարդ՝ հայտնելով, որ դրանք պատկանել են եղբորը։

Կապանում բնակվող 37-ամյա մի տղամարդ ոստիկանության Կապանի բաժնում կամավոր հանձնել է «Մոսին» հրազեն ու տարբեր տրամաչափի 200-ից ավելի փամփուշտ, որոնք, ըստ նրա՝ պատկանել են հանգուցյալ հորը։

Երեւանում բնակվող մի տղամարդ, որը Արցախյան ազատամարտի մասնակից է, ոստիկանության Էրեբունու բաժնում կամավոր հանձնել է գործարանային համարով թմբուկավոր ատրճանակ։

Նշանակվել են դատաձգաբանական փորձաքննություններ։

Հիշեցնենք, որ ապօրինի պահվող զենք-զինամթերքը կամավոր հանձնողներն ազատվում են քրեական պատասխանատվությունից։