Այսօր` հունիսի 7-ին միջադեպ է տեղի ունեցել «Իրազեկ քաղաքացիների միավորում» ՀԿ-ի ղեկավար Դանիել Իոաննիսյանի եւ ոստիկանության լրատվական ծառայության նախկին պետ, գնդապետ Սայաթ Շիրինյանի միջեւ, ում Իոաննիսյանը հորդորել է դիմակ կրել իր ավտոտնակում:
Ոստիկանության գնդապետը խիստ վրդովել է այդ նկատողությունից եւ կոպիտ պատասխան տվել Իոաննիսյանին:

«Ընկեր ջան, սա իմ տունն ա, հիմա դու եկել ես, ինձ ասում ես` իմ տան մեջ պետք է դիմակ կրե՞մ: Սա իմ տունն է, հավասարեցված է տանը, ինչպես նաեւ մեքենան, հիմա ես քեզ պետք է իրավաբանություն սովորեցնե՞մ: Դու իրավաբանությունից ընդհանրապես հասկանո՞ւմ ես, ինձ մի ներվայնացրա, երիտասարդ: Դու ներխուժում ես հիմա իմ բնակարան: Ես իմ տանը լավ եմ անում, դիմակ չեմ կրում, քեզ ի՞նչ:

Կարողա գաս, ինձ տանն էլ ասես, ինչի դիմակ չես դնում: Ես ոստիկանության գնդապետ եմ, ես շատ լավ գիտեմ` ինչ եմ ասում: Այո-ի քարոզչություն եմ անում, դրա համար էլ դիմակ չեմ դնում, գնացեք դրա մասին մտածեք, մինչեւ մարտի 12-13-ը քարոզչություն էիք, անում, հիմա եկել, ինձ ասում ես` ինչի դիմակ չես դնում, լավ եմ անում: Եթե երկիւր կառավարել չգիտեք, ինչ եք ուզում ինձանից»,- բորբոքված ասում էր նա:

Դանիել Իոաննիսյանն էլ նրան պատասխանեց, որ ՀՀ պարետի որոշումը պարտադիր է նրա համար նաեւ տանը, ամեն տեղ:
«Իյաաա, էս ի՞նչ ես խոսում, կգոռամ, մի հատ էլ ոտդ ստեղ դրեցիր բերնիդ կտամ, հերիք եղավ, բոլ եղավ: Դուք ինչի համար եք այստեղ պարոն կապիտան, հասարակական կարգ պահպանեք: Որոշումը ցույց տվեք, տուգանեք եւ գնացեք ստեղից, հերիք եղավ, բոլ եղավ, չի կարելի մարդկանց էշի տեղ դնել»,- վրդովվեց Շիրինյանը:

Նշենք, որ  այս ընթացքում Դանիել Իոաննիսյանին ուղեկցող ոստիկանը չմիջամտեց միջադեպին եւ ոչ մի բառ չասաց: