Էքսպրես թեստավորումը զգալիորեն կարագացնի մոնիթորինգի, վերահսկման, զսպման եւ, ի վերջո, կորոնավիրուսի ոչնչացման հարցում մեր հնարավորությունները։ Մենք կհաղթենք վիրուսը։ Այդ մասին հայտարարել է ԱՄՆ նախագահ Դոնալդ Թրամփը։

Նա նշել է, որ Abbott Labs ընկերությունը ստեղծել է «արագ թեստեր», որոնց պատասխանը ստացվում է 5 րոպեից, եւ հայտարարել է, որ ամեն օր կթողարկի այդպիսի 50 թեստ՝ սկսած այս շաբաթվանից։

«Դա նաեւ թույլ կտա մեզ անհապաղ հետազոտել բժիշկներին, բուժքույրերին եւ առողջապահության այլ աշխատակիցներին, եւ թույլ կտա մեզ գործել արագ ու ագրեսիվ կերպով վիրուսի տարածումը կանխելու համար, ինչը շատ կարեւոր է կարեւորագույն հաստատություններում, ինչպիսիք են հիվանդանոցներն ու ծերանոցները»։

Նա նշել է, որ Նյու Յուրքում 1100 հիվանդներ բուժվում են հիդրոքսիքլորոխինով եւ Z-պակով, որը ազիթրոմիցին է։ «Արդյունքների մասին դեռ վաղ է խոսել։ Տեսնենք՝ ինչ կստացվի»։

Ծանր հիվանդներին բուժելու համար որպես փորձարարական միջոց թույլատրվել է օգտագործել վերականգնվող պլազման։ «Այդ բուժումը ներառում է վիրուսից ապաքինված հիվանդներից արյան պլազմայի ստացում, այսինքն՝ նրանց պլազման հարուստ է վիրուսի դեմ հակամարմիններով։ Մենք ներարկել ենք այդ արյունը վեց հիվանդներին։ Տեսնենք՝ ինչ կստացվի։ Եւ մենք ունենք որոշ նախնական արդյունքներ, որոնք դրական են։

Այդ մեթոդը կիրառվել է ավելի քան հարյուր տարվա ընթացքում․ դա արյան հետ կապված թերապիան է։ Այնպես որ դրանում արտասովոր ոչինչ չկա։ Փոխվել է բարդության մակարդակը, սակայն այդ հայեցակարգն օգտագործվել է տեւական ժամանակահատվածի ընթացքում, այդ թվում՝ «իսպանական գրիպի» համաճարակի ժամանակ։